Ttiimu ya Uganda ey’okubaka the She Cranes olunaku lw’eggulo yatandise empaka za Netball Test Series e Bungereza.
Olunaku lwenkya bano baakuddamu okuttunka ne Wales mu luzannya olwokubiri olwo ku Lwomukaaga bamalirize empaka zino.
Uganda ekwata kyamusanvu mu mawanga agazannya netball munsi yonna kyokka yo Wales eri mu kyamwenda.
Abazannyi ba Uganda bamalirivu okulaba nga bawangula empaka zino basobole okwekuumira mu bifo eby’okumwanjo mu nsengeka z’amawanga agazannya okubaka munsi yonna.
Wabula ne Wales nayo eri mu lutalo lw’akulaba nga bawangula enzannya zino.
Mu byafaayo Wales tawangulangako Uganda nga ne kumulundi ogusembyeyo ttiimu zombi okuzannya, mu Netball World Cup, Uganda yawangula ggoolo 73-56.
Eyali amyuuka kapiteeni wa Wales mu Netball World Cup nga kati yaweereddwa obwa kapiteeni obujjuvu Beth Dyke ng’ali wamu n’bazibizi okuli Nia Jones, Ella Powell-Davies n’omuteebi Phillipa Yarranton ttiimu eno beesinze okusibirako olukoba.
Ku ludda lwa She Cranes, omutendesi Fred Mugerwa yesigamye nnyo ku bazannyi abaali mu Netball World Cup, kyokka ng’ayongeddeko n’omuzibizi Sandra Nambirige, Forence Adunia wamu ne Mercy Batamuliza baasuubira okubaako kye bongera ku ttiimu.
Mugerwa agamba nti Test Series zaakubayamba kyokka essira basinze kuliteeka ku kuwangula Bungereza, Australia and New Zealand mu mpaka za Nations Cup oluvannyuma lwa Test Series.
Ono agamba nti guno tegugenda kubeerwa mulimu mwangu kyokka singa bawangulayo enzannya ezimu, kye basuubira okukola, basobola okudda mu kifo ekyomukaaga eky’abayamba okugenda mu Netball Fast Five mu 2022.
rnalujja@ug.nationmedia.com
