BYA ABDUL-NASSER SSEMUGABI
assemugabi@ug.nationmedia.com

ENSISINKANO
M’gladbach 0-3 Leverkusen
Leverkusen 2-2 M’gladbach
M’gladbach 2-3 Leverkusen
M’gladbach 1-2 Leverkusen
Leverkusen 4-0 M’gladbach

M u German Bundesliga, emipiira egisembyeyo ebiri, Leverkusen egiwangulidde ku nnyondo. Augsburg yagikuba 1-0 ku ddakiika 94. Ate RB Leipzig yagidkutulidde mu ddakiika 93 ne guggwa 3-2.
Oyinza ookugamba Leverkusen etandise okukendeera amaanyi ge yatandikirako sizoni. Naye ate bw’otunuulira ebyatuuse ku Bayern Munich, eyookubiri, tolemwa kukulisa basajja ba Xabi Alonso buwanguzi.
Bayern yayingidde wiikendi ng’esabirira Leipzig esuuze Leverkusen, ate nga kyabadde kisoboka, naye gye byaggweeredde nga Werder Bremen erumbye Bayern awaka n’eginyigirawo 1-0. Kino kyawadde Leverkusen enkizo ya bubonero musanvu wadde nga Bayern yabadde erinayo eggolu lya Union Berlin we twaggidde mu kyapa.
Ku Lwomukaaga Leverkusen edda mu nsiike nga ekyaza Borussia Moenchengladbach, eyaakamala okukuba Stuttgart 3-1. M’gladbach y’emu ku ttiimu ezitatya banene nga sizoni ewedde yakubako ne Bayern 5-1.
Mu byafaayo, Leverkusen y’erina enkizo. Mu nsisinkano e 46, ewanguddeko 25, M’gladbach mwenda, n’emirala 12 maliri. Mu kugabana omupiira guno gutera okubaamu ggoolo 3.39. Mu mipiira etaano gye zaakasemba okusisinkana, Leverkusen ewanguddeko ena, omulala maliri, nga ne lwe zaasemba okusisinkana nga August 26, 2023, Leverkusen yalumba M’gladbach awaka né gikuba 3-0.
Omuzibizi Jonathan Tah, eyateebera Leverkusen ggoolo eyookubiri ku Leipzig, tajja kusamba guno kubanga yawezezza kkaadi za kyenvu ttaano. Omuwuwuttanyi Exequiel Palacios yagulwaliramu gattako Jeremie Frimpong. Omutendesi Xabi Alonso ajja kuba asabirira Nathan Tella, eyateeba esooka, nga yaakasikira Frimpong, asigale ku mutindo mu kaseera nga ttiimu etandise okuwulira ppuleesa y’okukulembera ekimeeza.
Omuteebi Tomas Cvancara tajja kusambira M’gladbach n’omuzibizi Lukas Ullrich kubanga baalwadde. Kyokka Nico Elvedi, Ko Itakura, ne Joe Scally balina okuzannya beegendereza obutafuna kkaadi ya kyenvu kubanga balina nnya.
Mu mirala, Bayern eyabadde ettunka ne U. Berlin eggulo, erina okuzannya ne Augsburg, emu ku ttiimu ezitawaanya abanene. Yali eremedde ku Leverkusen ate nga bulijjo tetya muliraanwa Bayern, anti zombi zisangwa mu kibuga Munich. Borussia Dortmund eyagala ekyokuna ekyaza Bochum, eri mu ky’a 14. Kyokka ne Leipzig eyagala kuwanulayo Stuttgart mu kyokusatu, anti akabonero kamu kokka ke kazaawula.

Kane ayagala ngatto
Omungereza Harry Kane teyataasa Bayern kukubwa Bremen, era yasigala ku ggoolo 22. Serhou Guirassy, owa Stuttgart, alina 17 naye akyal ne Guinea mu African Cup of Nations. Lois Openda, owa RB Leipzig alina 12.
Victor Boniface, owa Leverkusen, alina 10. Jonas Wind, owa Wolfsburg ne Undav, owa Stuttgart, balina mwenda.
Leroy Sane, owa Bayern ne Ermedin Demirovic, owa Augsburg, balina munaana. Álex Grimaldo, owa Leverkusen, Omar Marmoush, owa Frankfurt ne Alassane Pléa, owa Borussia Mönchengladbach, Marvin Ducksch, owa Bremen, Maximilian Beier, owa Hoffenheim, Donyell Malen, owa Dortmund, balina musanvu.
Tim Skarke, owa Darmstadt, Eren Dinkci, owa Heidenheim, Julian Brandt, owa Dortmund, Tim Kleindienst, owa Heidenheim, ne Lucas Höler, owa Freiburg, balina mukaaga. Jan-Niklas Beste, owa Heidenheim, Niclas Füllkrug, owa Dortmund, Jonas Hofmann, owa Leverkusen, Andrej Kramaric, owa Hoffenheim, Jeremie Frimpong, owa Leverkusen, Takuma Asano, owa Bochum, Chris Führich, owa Stuttgart, Florian Wirtz, owa Leverkusen, ne Xavi Simons, balina ttaano.